شفت ملاك...

السلام عليكم ورحمة الله وبركاتة
**



في الحلم شفت ملاك ... بيقوللى قوم ياللا
هنروح نزور النبي ... أنا قلت له إن شالله
جِبت الهدوم البيض ... همِّيت انا اتوضَّى
وملايكه بتصب لي ... مَيَّه ف طبق فضّه
مشتاق انا للنبي
ونزلت أرض النبي ... حطِّيت هناك قدمي
أول خطاوي القدم ... خطيت على ألمي
ريحة النبي هفهفتْ ... بالمسك والعنبرْ
فلقيتني في مسجده ... وباصلِّي وباكبرْ
مشتاق انا للنبي
نور النبي هزِّني ... وطواني ليه طيَّه
زمزم هناك شدِّني ... فشربت م المَيَّه
في الكعبه انا لبِّيتْ ... وإيماني جُوَّايا
ولحدِّ لمَّا جيتْ ... ريحة النبي معايا
مشتاق انا للنبي