رباعيات الشاعر العامي صلاح جاهين ربما من أحكم ما قرأت
من الشعر العامي المصري
وأكثرهم شجنا ولقد اخترت لكم هذه المنثورات
المتفرقة من رباعياته من بين حوالي 140 رباعية
التي أظنها تحمل حكمة شاعر وأديب وإنسان
تدعونا للتأمل والتدبر في الناس والحياة
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي
دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي
سهير ليالي وياما لفيت وطفت
وف ليله راجع في الظلام قمت شفت
الخوف… كأنه كلب سد الطريق
وكنت عاوز أقتله… بس خفت
وعجبي…
ولدي إليك بدل البالون ميت بالون
انفخ وطرقع فيه على كل لون
عساك تشوف بعنيك مصير الرجال
المنفوخين في السترة والبنطلون
وعجبي…
يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي
سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي
دي مذكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي !
موضوع: رباعيات صلاح جاهين 
الأحد 27 أكتوبر 2019 - 20:17
