اسرار من عالم الرجال(كونى أنثى)

السر الآول 
الرجل بشكل عام يعامل الامور بشكل منطق ومعلومات أكثر من العواطف .. يعني لما يدلعك ويقول لك أحبك بالنسبة له هو قال لك معلومة أو حقيقة واقعة ما تتبدل فما يحتاج كل شوي يعيدها أو يذكرج فيها كل يوم <<< عاش التفكير العقلاني .. 
يعني مو كل يوم تسألينه تحبني لو ما تحبني ؟؟؟ قولي له أحبك وانتظري الرد يا حلوة .
السر الثاني ::
الرجال يمكن يسوي أي شي عشان يحصل على الجنس الممتع ومستعد يلتزم معاك بعهود ووعود ما دام حصل منج الراحة اللي يبيها .
السر الثالث::
الرجال بشكل عام يحب الشعر الطويل ويعتبر بالنسبة له مثير جنسي قوي ،، أدري ملقوفات وبتقولون ليش ؟ لأن الشعر كلما طال اقترب من المؤخرة وداعبها وهذا يحفز خيال الرجل ويثيره وشي ثاني الشعر الطويل يزيد ملامح المرأة أنوثة ويصير مثل التاج على راس المرأه
السر الرابع::
الرجال ما فيه شدة على النكد والجدال ويكرهه كره العمى فما بالك إذا كنتي انتي مصدر الجدال أو النقاش المبتور ؟؟ أكيد بينفر منك ولا تقولين ليش يطلع برا ويقعد مع أصحابه وآنا ألبس وأتمكيج وأتعطر وغيره وما يعبرني .... لأن أصحابه يروح ويفرفش معاهم وحتى نقاشهم يدخل فيه مزاح ويتقبله منهم لكن انتي لا لأنه عايشة معاه فلا تخلين الرجال كلما دخل البيت يشوف على جدار جبهتك مكتوب جدال وبخط عريض بعد .. لذلك اذا دخلتي نقاش حاد معاه اقطعيه وقولي مزاجي مب أوكي أو تعبانة وما أبي أتناقش أو سوي روحك متذكرة شي وقومي وارجعي له ببسمة حلوة ولا كأنه صار شي ..
شاعرنا المبدع شيقول : 
ولا تكثري الشكوى فتذهب بالهوى 
فيأباك قلبي والقلوب تقلب
السر الخامس::
الرجل يحتاج ( ركزوا على كلمة يحتاج ) إنك تقولين له لا بعض الأحيان
( مو كل وقت ترى بيكفخ ) يعني تتمنعين عنه شوي،، تدرون ليش ؟
شوفوا إجابتهم وبتنصدمون : عشان يحس ان اللي عنده صيدة ثمينة مو كل ما بغاها حصلها ( ما يحبون الشي اللي يجي بسهولة أبد وذبحتهم المنافسة). 
يعني مثلا قال لك بنطلع الليلة قولي له حبيبي عازمتني صديقتي الليلة وما يصير أكنسل الطلعة ، ان شاء الله بكرة بنطلع ) خليه يتحين الفرص عشان يقضي معاك وقت حلو ومميز .
السر السادس::
الرجال يقولون: لا تسأليني شلون شكلي أو مظهري إلا إذا كنتي مستعدة تسمعين الإجابة الحقيقية ( نذالة ) .. باختصار خليك واثقة من نفسك ولا تسألين وإذا تبين تاخذين رايه في شي خلي جميع جوارحك مستعدة للرد الحقيقي واصمدي أمام الجواب ..
السر السابع ::
الصوت الناعم يصيب الرجل في مقتل .. تذكري في كل لحظة
انك انثى وخلي لسانك حلو وصوتك ناعم وتعمدي تتكلمين بصوت دايخ خصوصا أوقات الود أو قرب
موعد النوم ترى الرجال يذوب وما يقدر يقاوم كل هالنعومة والدلع والدلال يرووووح فيها المسكين ... شوفوا حبيباتي آنا عصبية وما اقدر بعض الأحيان أمسك نفسي لكن شوي شوي عودت روحي أني اعبر عن عصبيتي بحركات العين أو أسوي نفسي أتدلع على عيالي مثلا أقول لهم: كذا تسوي حق ماما الحلوة (بصوت حزين وبدلع ) حتى هو يقعد يطالع فيني .
واتبعت بعد طريقة تبعدني عن الصراخ إذا ولدي سوا شي غلط استخدم طريقة الاستبعاد المؤقت (طريقة السوبر ناني) يعني أشيله و أخليه يقعد في مكان معين وممنوع يطلع من المكان لمدة 2 أو 3 دقايق وأقول له السبب اللي خلاني أعاقبه واذا خلص الوقت اروح واقول له يعتذر لما واذا اعتذر أحضنه وتنتهي السالفة وهالطريقة فعالة وايد تخليك هادية وبعيدة عن صراخ الوحوش وبعيدة عن استخدام الضرب ... 
السر الثامن ::
يميل الرجل للبصبصة على النساء وعيونه تطلع لبرا لما يكون في حالة 
زعل أو خصام مع زوجته <<< والله مشكلة ابتلشنا فيهم .
لذلك حاولي تقللي فترة الخصام بس اذا كان هو مزعلنك لا تتنازلين له وإذا رجع البيت حسسيه انك مستعدة تتصالحون بطريقة غير مباشرة يعني اكشخي واذا ابتسم لك ابتسمي بسمة زعل ((فيه شي حلو علمت زوجي عليه قلت له فيه قاعدة لازم نلتزم فيها ان اذا تزاعلنا ما نرقد إلا متراضين والطرف اللي سبب المشكلة يتنازل ويبدأ يصالح <<< شفتوا ما يفيد معاهم إلا الحيلة .
السر التاسع ::
ضروري ضروري يحس الرجال انك سعيدة معاه بشكل عام ومبينة له هالشي (فيه نسوان تكون سعيدة وتمدح زوجها قدام الناس لكن قدامه ما تقول كلمة حلوة ولا تمدحه وإذا مدحته بكلمة ظلت على الكلمة طول العمر .. يعني اشترى أغراض البيت قالت ما قصرت ، وداها مطعم وعشاها قالت ما قصرت ، ساعدها في أشغال البيت قالت ما قصرت .. انزين إلى متى بتظل هالكلمة لاصقة بلسانك ؟؟ ،، تعلمي كلمات جديدة تنعش حياتكم ..
رجاء حبيباتي اتركوا عنكم الروتين في الكلمات والأفعال ترى الرجال يحس انه بطل الأبطال وقلبه يغرد من الفرحة إذا حس انه قادر يسعد زوجته وانها طايرة فيه ولا تستهينون في هالشي ترى الرجال مهم عنده ان يسعد زوجته لكن لو حس ان هي ما تقدره على أبسط الأمور يجيه إحباط وما يعطي ولا يسعى يسعدك مرة ثانية وتدرون شيقول في قلبه : آنا أتعب وأشقى عشان أوفر لها اللي اقدر عليه وحتى كلمة حلوة تستكثرها علي هالهبلة << لا تستغربون ترى الرجال يقولون في قلبهم أشياء لو سمعتوها بتستغربون ..
يعني حتى لو جاب لك حلاوة مصاص نطي بابتسامة حلوة وبوسيه وقولي له تسلم يالغالي الله يخليك لي تذكرتني وانت في عز انشغالاتك ، الله لا يحرمني منك ومرة ثانية صدقيني بجيب لك البرادة كلها .. ، وطبقي هالشي على باقي الأمور وبصير زوجك أبو الكرم ..
بيني تقديرك للرجال بالكلام والأفعال وبتشوفين اللي ما تتوقعينه ..
شلون بالكلام ؟؟ كل مرة امدحيه بكلمة غير : ما قصرت يالغالي أو يا حبيب قلبي ،، أحبك والله ،، فديتك يا بعد روحي ،، الله لا يحرمنا من عطاياك ،، لو كل الرجال نفس طيبتك وكرمك كان الدنيا بخير ،، واذا عطاك شي غالي : قولي وينه حاتم الطائي يجي يشوفك بس أخاف يغار منك .. كلمات بسيطة لكن عند الرجال تعني انه نجح في الاختبار وبجدارة 
بالأفعال : اهتمي بنفسج عشان لما يقبل عليك تكونين مرتاحة ومستعدة لقضاء لحظات حلوة معاه .
اهتمي بجمالك وخليه يشوفك بصورة حلوة ومتجددة كل يوم هذا الشي يخليه يحس انك مقدرة رغباته كرجل .. ترى ما فيه أحد ما يحب يتذوق الجمال ..
حافظي على نظافة بيته وسوي الأشياء اللي يحبها ..
فيه بناات يقولون يعني كل شي أسويه بس عشانه ، ألبس اللي يحب وأتعطر باللي يحب وأسوي كل شي يحب ،، يعني أمحي شخصيتي ؟؟
لا حبيبتي ، بس اذا انتي تبين تصطادينه لازم تستخدمين الطعم المناسب له وليس لك ،، يعني تخيلي صياد يروح يصيد سمك ويحط لهم في الطعم كبسة أو غوزي <<< ما يصير لازم الشي اللي يجذبهم عشان يقدر يصيدهم ..
واللي تحبينه من لباس وعطر وغيره استخدميه مع صديقاتك وأهلك لكن معاه استخدمي اللي يغريه وإذا عندك راي ثاني بالنسبة لأي موضوع تناقشي معاه واوصلوا لحل وسط
 
السر العاشر ::
مكمل للسر التاسع : الرجل يقولون ان هم اذا شعروا ان هم مو قادرين يسعدون الزوجة يحسون ان هم أقل رجل (شبه رجل) وان هو مو رجل حقيقي ،، يعني مثل ما قلنا امدحيه وقدريه بكل الطرق الممكنة عشان يحس بذاته كرجل لأن اذا ما حس بهالشعور بروح يدور عن اللي تمنحه هالشعور لأن ما يقدر يعيش بدون هالاحساس البطولي .. استغلي النقطة هذي زين لصالحك ما عندك عذر ..
السر الحادي عشر ::
الرجال يكرهون الانتظار و يحب المراة تكون جاهزة حزة الطلعة يعني اذا فيه طلعة جهزي كل شي تحتاجينه قبل كم ساعة واعتبري الموعد اللي اتفقتوا عليه مثل القنبلة المؤقتة اذا ما طلعتي من البيت بتنفجر ،، ترى مو كل مرة تتأخرين بيسكت أوبيهذر شوي وبينهي السالفة وبتروحون وهو مزاجه متعكر ويمكن يقلب الليلة نكد عشان تتأدبين ومرة ثانية بيكنسل الطلعة للأبد وبيتعذر بأي عذر غير شرعي <<< وهذا من أسرار العشيقة تشوفينها جاهزة قبل الموعد بفترة تناظر بعمرها وبالتلفون ومن يسوي رنة يلاقيها تتمختر بدلع وابتسامة لباب السيارة .
السر الثاني عشر::
تدخين السيجارة يخلي أي رجال ينظر للمرأة ان هي سهلة ورخيصة لذلك تشوفون بعض الرجال يركضون وراهم لأن يحسها صيدة سهلة وممكن تقبل بأي شي ..
طبعا مثل ما قلت لكم الدراسة هذي عالمية وهذا ما ينفي وجود هذي الظاهرة في البلدان العربية والإسلامية للأسف .
السر الثالث عشر ::
الرجال يخاف ان يحب المرأة و تتمكن من قلبه وبعدين تستغله ، يعني الرجال يخاف يكون مصدر للاستغلال والصرف المادي من قبل المرأة فلا تحسسينه انه هو صراف آلي وتحملينه اللي ما يقدر عليه حتى لو كان يحبك فعلا واعطيه اللي يبيه منك في المقابل ..
القاعدة تقول: اصرفي بس بذكاء مو تفسفسين فلوسه على اللي يسوى وما يسوى وجمعوا لكم فلوس تستثمرونها في شي يزيد سعادتكم واستقراركم و تقوية العلاقة بينكم.
 
الرجال يحب يصرف على اللي يحبها و يحسها تستحقه منجد وتحبه لنفسه ومعجبة بشخصيته مو هدفها المال اللي يملكه 

.
السر الرابع عشر::

إذا المرأة ما حسسته بوقفتها معاه في حالة الانزعاج العادية فبيعتبرك ضعيفة ومستحيل يفتح لك باب قلبه في حالة الزعل أو الحزن أو المشاكل الجادة .. اذا حسيتيه منزعج قدمي له كوب عصير ليمون واقعدي جنبه واحضنيه حسسيه انك مهتمة ولا تغثينه أو تسألينه مباشرة شفيك؟ ليش متضايق؟ وتمللينه من الأسئلة لأن كذا يحس انك مو واثقة من قدرته على حل الانزعاج .. بعدها يمكن يصارحك أو يعتدل مزاجه وينسى الانزعاج .




السر الخامس عشر ..



إذا كان متضايق منك أو متزاعلة معاه راضيه بشكل غير مباشر ،، شلون ؟ سوي له الأكلة اللي يحبها وقدميها بطريقة حلوة وقعدي جنبه وظلي ساكتة بحزن بس مو تصدقين عمرك وتاكلين معاه وعقب ما يخلص تأسفي له وعيونك نازلة للأرض وردي رفعيها وكأنك تبين تطالعينه عين بعين بس مو قادرة <<< هذي الطريقة حسب كلامهم تعتبر تذكرة الخروج من قفص الأسد <<< مو سهلين بعد يعرفون يعبرون ويتفلسفون