صالح المحلاوى
اعلام خاصة : 
الجنس :  عدد المساهمات : 18119
تاريخ التسجيل : 15/11/2011
 الموقع : المحلة - مصر المحروسة
العمل/الترفيه : اخضائى اجتماعى
المزاج : متوفي //
 |  موضوع: يا مفرق الهموم  الخميس 3 أبريل 2014 - 10:32 | |
| بسم الله الرحمن الرحيم السلام عليكم ورحمة الله وبركاتة يا مفرق الهموم 
يا مفرقين الهموم ومعبيينها كاسات
من كتر شرب الهم نظمت ليه ابيات
شفتوش يا ناس للهم واحد يقول اشعار
ومشيت معاه مشوار اصحى معاه وابات
،،،،،،
يوماتى واقف هنا حارس على بابى
ويقلى انت صديقى واعز اصحابى
والقعدة وياك تملى احسن من اللفلفة
والبعد عنك جفا وتوه مع غيابى
،،،،،،
حزن السنين وياك مرسوم على جبينك
وامشى يا صاحبى افتخر دى صحبتى تزينك
مين اللى ماشى الهم وصاحبه من قبلك
حتى اللى قبلك قالو ربنا يعينك
،،،،،،
يوماتى الاقى الناس بتقول حرام سيبه
اسرح بفكر واقول .. هى صحبتى تعيبه
انا عارفه راجل جدع ووفائه ماله حدود
علشان كدة مماشيه وعمرى ما هسيبه
،،،،،،
لفيت على العطارين أسأل عن الأفراح
قالو مكنشى حزين فى الدنيا الا ارتاح
طلبك بعيد عن هنا وطريقه كله صعيب
أما هنا يا حزين ما تلاقى غير اتراح
،،،،،،
ألزم لبيتك هنا وأنتظره لما يمر
وان مر يوم من هنا امسك فى توبه وجر
واياك فى يوم ما تقابله يشوف عليك أحزان
لو حتى بان ابتسم وأظهرله انك حر
،،،،،،
وقعدت جوه البيت وفتحت شباكى
ألمح بعينى السكك واستنى أفراحى
ودموعى فى محجرى بتلف وبتزرف
أضغط عليها وأقول برضك منيش باكى
،،،،،،
والحزن زى الديابة بيلف برة الدار
ينهش فى كل الجتت وعينيه تولع نار
أهجرنى مرة يا حزن وشوف صاحب غيرى
كفاية عمرى اللى عدى مماشينى بأستمرار
،،،،،،
والقعدة طالت قوى والعمر بيعدى
والفكر ضاغط على عقلى ولا يهدى
ونفسى اشوف الفرح ويمر عندى فى يوم
وكفاية فكرى يوماتى بيجيب ويودى
،،،،،،
يا دنيا له الهم واقفلى سجانى
والفرح ليه ديما ماشى ف طريق تانى
خلاص انا قررت اهجر طريق الحزن
وبلاش يا دنيا يوماتى م الهم انا اعانى
،،،،،،
وفى يوم لقيت الفرح خبط على البيبان
نفضت توب الحزن وفتحت ليه فرحان
وقلت اهلا يا صاحبى ومرحبا فى بيتى
نظر اليا وقال .. آسف غلطت فى العنوان |
|
.gif)
